A u hodhën në treg akullore me lëndë kancerogjene? Reagon AKU

Autoriteti Kombëtar i Ushqimit ka reaguar pas gjetjeve të publikuara një ditë më parë nga kreu i Kontrollit të Lartë të Shtetit se në vendin tonë në vitin 2021 janë tregtuar dhe konsumuar akullore të kontaminuara me Oksid Etileni që shkaktojnë kancer.

përmes një njoftimi të shpërndaë për mediat AKU bën me dije se pas marrjes së njoftimit se Shqipëria është në listën e 47 vendeve të cilat janë furnizuar me produktin akullore të prodhuar nga një kompani franceze, e cila përmbante “Substancën e paautorizuar oksid etileni në stabilizuesin lygomme të përdorur për prodhimin e akullores” janë marrë masa për identifikimin dhe asgjësimin e gjithë sasisë së këtij produkti.

“Më datë 30.07.2021 ora 11.49 PM nga sistemi RASFF informohemi se Shqipëria është në listën e 47 vendeve të cilat janë furnizuar me produktin akullore të prodhuar nga një kompani franceze, e cila përmbante “Substancën e paautorizuar oksid etileni në stabilizuesin lygomme të përdorur për prodhimin e akullores”.

– Me marrjen e njoftimit, AKU kryen verifikimet e sasisë të importuar për lotet respektive të evidentuara në njoftim, si dhe kreu inspektimin në këto Operatorë të Biznesit Ushqimor me qëllim ndjekjen e gjurmueshmërisë së produktit dhe tërheqjen nga tregu dhe asgjësimin e tij.

– Importet për këtë produkt sipas loteve të përcaktuara nga sistemi RASFF janë kryer gjatë periudhës nga data 01.03.2021 deri me 22.05.2021 (data para daljes së njoftimit nga sistemi RASFF me datë 31.07.2021) .

-Brenda periudhës 7 ditore nga marrja e njoftimit, është kryer inspektimi në subjektet respektive dhe më pas është bllokuar dhe asgjësuar e gjithë sasia e këtij produkti.

– Nga ana e AKU është bërë njoftimi për konsumatorin për produktet e përcaktuara në Lot-e respektive, për moskonsumim dhe kthim mbrapsht në pikat e shitjes ku e kishin blerë”, bën me dije AKU.

Kreu i Kontrollit të Lartë të Shtetit (KLSH), Arben Shehu, zbuloi një ditë më parë se në Shqipëri janë tregtuar akullore të kontaminuara me Oksid Etileni që shkaktojnë kancer, leucemi dhe ndikojnë në aftësinë riprodhuese tek meshkujt.

Komentet Shehu i bëri në Komisionin e Ekonomisë dhe Financave, teksa po raportonte mbi punën e institucionit që ai drejton.

Sipas tij, duhet të ketë një analizë për faktorët që kanë ndikuar në rritjen e të sëmurëve me sëmundje tumorale.

Shehu zbuloi se janë konsumuar 13.2 ton akullore me oksid etileni, teksa produktet janë shitur kryesisht në: Tiranë, Durrës, Fier, Elbasan, Vlorë, Berat, Lushnje, Korçë, Shkodër, Sarandë, Krujë, Burrel, Peshkopi, Tropojë, Lezhë.

LEXONI GJITHASHTU:

• Kreu i KLSH: Shiteshin akullore me Oksid Etileni në 2021, shkaktojnë kancer
• Lëndë të rrezikshme në akullore, AKU asgjëson 36 tonë ‘Bounty’, ‘Snickers’ e ‘Twix’