Abdixhiku: Dita kur vendimmarrja iu kthehet qytetarëve, vendosni për të ardhmen

Kryetari i LDK-së, Lumir Abdixhiku ka votuar sot në shkollën “Faik Konica”. I shoqëruar nga bashkëshortja e tij, Abdixhiku uroi që kjo ditë e zgjedhjeve lokale të përfundojë sa më mirë teksa e cilësoi këtë ditë një festë pasi vendimmarrja u kthehet qytetarëve.

“Sot është festë, sepse vendimmarrja u kthehet qytetarëve tanë. S’ka gjë më të mirë e më të bukur sesa kur qytetarët vendosin për të ardhmen e tyre. Uroj që kjo ditë të kalojë sa më mirë dhe të përfundojë si e tillë. Në veçanti uroj 41 mijë votuesit që për herë të parë sot ushtrojnë të drejtën e tyre demokratike në një shoqëri të mbarë e të mirë”, tha Abdixihiku.

Ai përgëzoi mediat dhe komisionarët e KQZ-së, duke thënë se po kontribuojnë që kjo ditë të shkojë sa më mirë.