Abuzimet me pronat, Gjykata e Durrësit ndryshon masën e sigurisë për 10 nga 17 të arrestuarit

Gjykata e Durrësit ka ndryshuar masën e sigurisë për 10 nga 17 efektivët e policisë, inspektorët dhe ndërtuesit e arrestuar për shpërdorim detyre me ndërtimet pa leje në qytetin bregdetar, në Shijak dhe në zonën e Manzës.

Nga masa “arrest me burg”,  gjykata e qytetit bregdetar caktoi ndaj të arrestuarve masat e pezullimit nga detyra dhe atë të detyrimit të paraqitjes.

Seanca maratonë e verifikimit të masave të sigurisë gjatë së dielës zgjati më shumë se 10 orë. Një nga efektivët e arrestuar u dërgua në spital për shkak të shqetësimeve shëndetësore.

Operacioni “Abuzuesit” u realizua pas një hetimi 7 mujor.

Nga ky operacion rezultuan abuzime me 37 objekte disa katëshe banimi por edhe biznesi.

Sipas Prokurores së Shërbimit për Çështjet e Brendshme dhe Ankesave, policët e arrestuar në bashkëpunim dhe inspektorët e Mbrojtjes së Territorit të njësive administrative Manëz dhe Shijak kishin ngritur një skemë korruptive duke mos hetuar e raportuar ndërtimet pa leje, por edhe ngjarje të tjera kriminale.