Advocaat bën mrekullinë, shteti me 156 mijë banorë për herë të parë në Kupën e Botës

Ishulli i vogël i Karaibeve, Curaçao, do të shkojë në Kupën e Botës 2026 për herë të parë si kombi më i vogël për nga popullsia që është kualifikuar ndonjëherë për ngjarjen kryesore në futbollin e meshkujve, një arritje që shumë e konsiderojnë një mrekulli dhe që i dedikohet eksperiencës së trajnerit të njohur, Dick Advocaat.

Curaçao, një territor autonom me rreth 156,000 banorë brenda Mbretërisë së Holandës, thyen rekordin e Islandës, me një popullsi prej pak më shumë se 350,000 banorësh, e cila ishte vendi më i vogël i mëparshëm që arriti në Kupën e Botës, kur u kualifikua për Rusinë 2018.

Ekipi, që mbështetet shumë te lojtarët e lindur dhe të rritur në Holandë, e shfrytëzoi rastin të martën duke marrë një barazim 0-0 në Xhamajka dhe duke përfunduar në krye të një grupi me katër ekipe. Kundërshtarët e tjerë ishin Trinidad dhe Tobago dhe Bermuda e vendit të fundit.

Curaçao ka rekrutuar në mënyrë aktive lojtarë nga diaspora e saj, duke marrë leje nga FIFA, brenda rregullave të futbollit botëror, për të ndryshuar të drejtën e regjistrimit në ekipin kombëtar të lojtarëve që më parë kanë përfaqësuar Holandën në nivel të rinjsh ose nën-21 vjeç, përfshirë pesë që nga gushti.

Mbrojtësi Joshua Brenet madje ka luajtur një ndeshje kualifikuese për Kupën e Botës për Holandën në vitin 2016.

Tahith Chong, një ish-lojtar i të rinjve të Manchester United, është një nga të paktët anëtarë të skuadrës i lindur në Curaçao, e cila quhej Antilet Holandeze deri sa mori autonominë e saj 15 vjet më parë.

Një trajner i njohur holandez e ka udhëhequr Curaçaon drejt fazës elitare të Kupës së Botës së zgjeruar me 48 ekipe në Shtetet e Bashkuara, Kanada dhe Meksikë.

Dick Advocaat, në moshën 78-vjeçare, konsiderohet arkitekti i “mrekullisë” së Curaçaos, duke shfrytëzuar eksperiencën e tij të gjatë për të udhëhequr ekipin drejt historisë për herë të parë.

Ai e çoi Holandën në çerekfinale në edicionin e vitit 1994 dhe drejtoi Korenë e Jugut në Kupën e Botës 2006 në Gjermani.

Aventura e Curaçaos pritet të nxjerrë në skenë lojtarë nga klube të panjohura.

Skuadra që siguroi kualifikimin përfshinte lojtarë nga Rotherham në ligën e tretë të Anglisë, Bandırmaspor në divizionin e dytë turk dhe Abha në Arabinë Saudite.

Curaçao mori rezultatin historik pavarësisht se nuk e kishte Advocaat në stol. Ai humbi ndeshjen në Xhamajka sepse iu desh të kthehej në Holandë fundjavën e kaluar për arsye familjare. Ekipi i tij pa Xhamajkën të godiste traversën tri herë në pjesën e dytë në Kingston.

Një penallti që mund të ishte vendimtare për ekipin vendas në kohën shtesë u anulua pas një rishikimi video.

Curaçaos do t’i bashkohen fqinjët rajonalë, Panama dhe Haiti, të cilët gjithashtu siguruan vendet e tyre në Kupën e Botës të martën.

Panama u kualifikua për Kupën e Botës për herë të parë pas 2018-s pasi mposhti El Salvadorin 3-0, me golat e shënuar në pjesën e parë nga César Blackman dhe Eric Davis, si edhe nga Jose Luis Rodriguez në fund të ndeshjes.

Ajo kaloi Surinamin, një tjetër ekip me ndikim holandez, i cili e nisi ndeshjen në krye të grupit përpara se të humbiste 3-1 kundër Guatemalës.

Haiti, një vend i trazuar në Karaibe, pati një fushatë të papritur dhe mundi Nikaraguan 2-0 për të fituar grupin e saj ndaj favoritëve Honduras dhe Kosta Rikës, e cila ishte çerekfinaliste në Kupën e Botës 2014.

Udhëtimi i vetëm i mëparshëm i Haitit në Kupën e Botës ishte në Gjermaninë Perëndimore në vitin 1974.

Rezultatet e ndeshjeve të Karaibeve dhe Amerikës Qendrore të martën përcaktuan gjithashtu gjashtë ekipet që do të marrin pjesë në playoff-et ndërkontinentale në Meksikë në mars.

Dy ekipe do të kualifikohen nga eliminatoret, ku përfshihen Xhamajka dhe Surinami, plus Iraku nga Azia, Kongo nga Afrika, Bolivia nga Amerika e Jugut dhe Kaledonia e Re nga Oqeania.