Agim Baçi: Ramën e trembin vetëm protestat e qytetarëve, jo ato politike

Gazetari Agim Baçi thotë se kryeministri Edi Rama trembet nga protestat qytetare dhe jo nga ato politike.

Në emisionin “Review” në Euronews Albania, Baçi u shpreh se kur ka pasur protestë qytetare, Rama është munduar ta politizojë, për ta shuar atë.

“Po të shohësh me vëmendje, zoti Rama ka ndjekur një praktikë këto 10 vite. Çdo lloj proteste qytetare është munduar ta politizojë, thotë që aty është PD-ja se vetëm ashtu mund ta shuante.

Në thelb, zoti Rama ka treguar që ka gjithmonë një frikë, që nga protesta e armëve kimike, kur u ngritën studentët, kur u ngrit çështja e Rashës. E di që po u bë uragan popullor, nuk ke më justifikim. Përsa kohë janë ngritur partitë politike, thotë, është ngritur kundërshtari që do të marrë pushtetin. Nuk është se e tremb kjo gjë”, theksoi ai.

Pas më shumë se dy orësh, përfundoi protesta kombëtare e opozitës. Në protestë pati 20 folës, ndër to kryedemokrati, Sali Berisha dhe kreu i Partisë së Lirisë, Ilir Meta.

Të dy liderët, hodhën akuza në drejtim të kryeministrit Edi Rama, për shpopullimin e vendit, situatën ekonomike dhe korrupsionin.

Protesta, pas përfundimit të saj, u shoqërua me incidente. Gjithçka filloi pasi Berisha mbaroi fjalën e tij dhe protestuesve iu bë thirrje për të ndezur qirinj në shkallët e Kryeministrisë, në nder të personave që kanë humbur jetën në përplasjet me policinë.

Protestuesit çanë kordonin e policisë dhe hynë në oborrin e Kryeministrisë, ku hodhën bojë në dyert dhe dritaret e godinës.

LEXONI GJITHASHTU

• “Beogradi organizon protesta në Shqipëri”, Ngjela: Ndodhin kur ka tensione në veri
• ‘Kishte me vete mjet prerës’, policia reagon për shoqërimin e protestuesit
• ‘Protestën e kërkuan njerëzit’, ish-deputetja e PL-së: Është vetëm fillimi