“Agnesa e Zotit” vjen në Tiranë, drama shokuese shfaqet në Universitetin e Arteve

Laura Nezha, Eni Jani dhe Violeta Trebicka sollën mbrëmë në sallën e Universitetit të Arteve, shfaqjen teatrale “Agnesa e Zotit”.

Nën regjinë e të mirënjohurit Kiço Londo, aktorët interpretuan mitin e paparashikueshëm të nënës dhe natyrës njerëzore.

Drama është një vepër që provokon mendime. Ajo vë në pikëpyetje siguritë ligjore, psikiatrike, fetare dhe ekzistenciale, duke ekspozuar paqartësitë morale, duke përdorur një dialog jashtëzakonisht gazmor, dramatik, i cili është plot humor dhe zgjuarsi.

 “Agnesa e Zotit” është një dramë e vitit 1979 nga dramaturgu amerikan John Pielmeier, i cili tregon historinë e një murgeshe të re (interpretuar nga Laura Nezha) që lind një fëmijë në manastir dhe këmbëngul se foshnja erdhi si rezultat i ngjizjes së virgjër.

Pasi fëmija gjendet i vdekur, një mjeke psikiatre (interpretuar nga Eni Jani) dhe nëna eprore e kuvendit (interpretuar nga Violeta Trebicka) përleshen gjatë hetimit për zbardhjen e ngjarjes.

Drama “Agnesa e Zotit” e cila ka marrë një sërë çmimesh dhe është shfaqur pothuajse në të gjithë vendet e botës,  do të vijojë të luhet edhe më 6 dhe 7 nëntor në sallën e Universitetit të Arteve në Tiranë.

LEXONI GJITHASHTU:

• “Ndërthurje” te Teatri Eksperimental, eksplorohen marrëdhëniet mes trupave dhe zërit
• Opera “Për tre grosh”, regjisori japonez vë në jetë veprën në teatrin “Migjeni”