“Agonia” e profesioneve të lira, tatimi i ri progresiv dhe beteja në Kushtetuese

Të vetëpunësuarit thonë se përballen këtë vit me një sistem të pandershëm taksimi, i cili nuk po i lejon të kryejnë aktivitet normal në treg.

Tatimi progresiv me fashat 15 dhe 23%, është denigrues dhe i nxit ata të mbyllin ose transferojnë aktivitetin në vend tjetër. Por, teksa ligji ka 6 muaj që është në fuqi, beteja e profesioneve te lira me qeverinë është në Gjykatë Kushtetuese, e cila do të japë një përgjigje në 18 qershor.

Gazetari i Euronews Albania, Neritan Gjergo bëri një pasqyrim të fashave që përfshin tatimi i ri progresiv për profesionet e lira.

Ata që sigurojnë të ardhura vjetore deri në 14 milionë lekë do të tatohen me 15% ndërsa ata që kanë të ardhura mbi 14 milionë lekë do të paguajnë 23% tatim, tha Gjergo.

Profesionistët e lirë që ofrojnë shërbime profesionale (26 lloje aktivitetesh, të ndara në 169 profesione) janë bërë pjesë e taksimit me fasha, dhe nuk trajtohen më si biznes i vogël me 0% tatim.

Të vetëpunësuarit fituan një betejë të vogël me ligjin “Për tatimin mbi të ardhurat” më 31 maj.  Pas debateve të shumta që shkaktoi moszbatimi korrekt i ligjit “Për tatimin mbi të ardhurat”, administrata tatimore rishikoi me ulje këstet e parapagimit të tatimit për profesionet e lira.

Në njoftimet e dërguara më 28 Maj nga Drejtoria Rajonale e Tiranës, rezulton se për llogaritjen e tatimit për muajin Maj dhe muajt qershor-dhjetor, janë zbritur shpenzimet 30%, të parashikuar në ligj për të vetëpunësuarit me xhiro deri 10 milionë lekë.

Zbritja e shpenzimeve apriori nuk u zbatua në llogaritjet e parapagimit të tatimit me njoftimet e mëparshme, dërguar në muajin Prill ndaj bizneseve. Tatimet për parapagimin e kësteve të tatimet u mbështeten mbi deklarimet e bizneseve, ku shumica e tyre kishin deklaruar shpenzime të ulëta, për shkak të mosnjohjes së tyre me dokumentim kontabiliteti.

Pas korrigjimit kësti i parapagimit për muajin Prill ka mbetur i pandryshuar. Ndërsa detyrimi për muajin Maj dhe muajt e tjerë është midis 27-34% më i ulët. Me një shembull të thjeshtë, tatimpaguesit nuk paguajnë 102,000 lekë për këstin e muajit maj, por me zbritjen e aplikuar 30% do paguajnë, 70.200 lekë.

Gjykata Kushtetuese do të shqyrtojë më 18 qershor 2024, bashkë të treja paditë e depozituara për shfuqizimin e ligjit “Për tatimin mbi të ardhurat”, që nisi zbatimin me profesionet e lira nga 1 janari.

LEXONI GJITHASHTU:

• “Taksa të padrejta, po largoni të rinjtë”,shoqëria civile protestë para Kushtetueses
• “Taksa 23%, gjoba e re për profesionistët”, Tabaku: 11 mijë biznese janë mbyllur