Një person ka humbur jetën si pasojë e një aksidenti trafiku të ndodhur sot në rrugën Lipjan-Shtime, në afërsi të fshatit Grackë e Vogël.

Zëdhënësi i Policisë së Kosovës, Agron Borovci, konfirmoi se aksidenti ka ndodhur rreth orës 12:45, ku janë përfshirë një kamion dhe dy automjete. Si pasojë e përplasjes, një person ka ndërruar jetë, ndërsa një tjetër është dërguar me lëndime të rënda në Qendrën Klinike Universitare të Kosovës për trajtim mjekësor.

Borovci shtoi se aksidenti ka shkaktuar vështirësi në qarkullimin e trafikut në segmentin rrugor Lipjan-Shtime-Topliqan-Bujan. Në vendin e ngjarjes ka dalë Njësia Rajonale e Trafikut, e cila ka ndërmarrë masa për lehtësimin e qarkullimit dhe për ri-drejtimin e trafikut. Po ashtu, autoritetet kanë nisur hetimet për të sqaruar rrethanat e aksidentit.