Aksident në tunelin e Llogarasë, përplasen dy automjete! Bllokohet qarkullimi

Një aksident rrugor është regjistruar brenda tunelit të Llogarasë pak orë më parë, ku dy automjete janë përplasur me njëra-tjetrën. Mësohet gjithashtu se nga ky aksident janë plagosur disa persona të cilët janë dërguar drejt spitalit për ndihmë mjekësore dhe nodhen jashtë rrezikut për jetën.

Si pasojë e përplasjes, janë shkaktuar dëme të konsiderueshme materiale në të dy mjetet, ndërsa qarkullimi në tunel është bllokuar përkohësisht.

“Sot, më datë 23.04.2026, rreth orës 17:20, është marrë njoftim për aksidentin. Sipas të dhënave paraprake, mjeti i parë tip BMW, me targa angleze, drejtohej nga një shtetas banues në Vlorë. Ndërsa mjeti tjetër, tip Volvo, drejtohej nga një shtetas banues në Tiranë.

Menjëherë në vendngjarje kanë mbërritur forcat e Policisë Rrugore, ambulanca dhe shërbimi zjarrfikës, të cilët kanë ndërhyrë për menaxhimin e situatës, ndihmën ndaj të lënduarve dhe garantimin e sigurisë në tunel.

Sipas informacioneve paraprake, disa persona kanë pësuar lëndime dhe janë transportuar drejt spitalit për ndihmë mjekësore, ndërsa grupi hetimor po punon për zbardhjen e plotë të shkaqeve dhe rrethanave të aksidentit.

Si pasojë e ngjarjes, qarkullimi në tunel është bllokuar përkohësisht, ndërsa autoritetet po punojnë për normalizimin e trafikut dhe largimin e mjeteve të dëmtuara”, thuhet në njoftimin e policisë.