Aksident tragjik në aksin Librazhd-Prrenjas, humb jetën një këmbësore

Një aksident me pasojë vdekjen e një këmbësoreje është regjistruar pasditen e kësaj të mërkure në aksin kombëtar Librazhd-Prrenjas, në vendin e njohur si “Ura e Spatharit”.

Sipas informacioneve nga vendngjarja, shtetasja Heidije Bajrami, rreth 65 vjeçe, është përplasur nga një automjet tip “Toyota”, i drejtuar nga shtetasi Xheladin Omeri. Përplasja ka qenë e fortë, duke i shkaktuar të moshuarës dëmtime të rënda.

E lënduara është transportuar me urgjencë drejt spitalit bashkiak të Librazhdit, por fatkeqësisht ka mbërritur pa shenja jete në urgjencë.

Ndërkohë, forcat e policisë kanë mbërritur menjëherë në vendin e ngjarjes dhe kanë nisur hetimet për zbardhjen e plotë të rrethanave të aksidentit. Drejtuesi i mjetit po merret në pyetje për të sqaruar dinamikën e ngjarjes.