Aksioni i opozitës/Nga ngujimi te greva e urisë, kush janë skenarët që po diskutohen

Opozita e drejtuar nga Gazment Bardhi dhe Sali Berisha zotohet se ka ndërmarrë një aksion pa kthim, e madje do ta përshkallëzojnë betejën në Parlament deri në plotësimin e kërkesave të tyre. Por edhe në seancën e kësaj të hënë, ku miratimi i buxhetit ishte synimi primar i maxhorancës skenari i përgatitur nga opozita u ndal deri në përdorimin e flakadanëve dhe një shkëndije të vogël zjarri aksidental.

Zërave për ngujim në parlament madje deri në grevë urie, nuk i kanë dhënë kurrë një përgjigje shteruese, as Gazment Bardhi si kryetar i Grupit Parlamentar dhe as Sali Berisha si kryetar i “Rithemelimit” të PD. Të dy, e kanë paralajmëruar ashpërsimin e aksionit, madje duke kërkuar nga maxhoranca që të mos t’i shtyjë drejt akteve ekstreme. Por shpjegimi konkret për këto akte ekstreme ka munguar dhe si Berisha edhe Bardhi, kanë hezituar t’i vendosin një emër.

Me Flamur Nokën të përjashtuar nga Lindita Nikolla gjatë seancës dhe të tjerë deputetë demokrat që pritet të marrin të njëjtin ndëshkim, por edhe me komisionet parlamentare që pritet të vijojnë të zhvillohen online, ngrenë shumë pikëpyetje mbi aksionin e opozitës në Parlament.

Pikëpyetjet mbeten të njëjta edhe për aksionet jashtë Parlamentit, edhe pse Bardhi ka deklaruar se opozita është e bashkuar si jashtë edhe brenda Kuvendit, por në 3 takimet që Berisha ka nisur në rrethe kanë munguar deputetët mbështetës të tij.

LEXONI GJITHASHTU:

• “Nuk e zgjodhi Berisha”- Vangjel Dule: Beleri është i burgosur politik
• Kryebashkiaku demokrat i Fushë-Arrëzit letër Ramës: Gati të strehojmë emigrantë