Aksioni i opozitës, Tabaku: Nuk jam dakord me këto mënyra, ia kam thënë dhe kolegëve

Deputetja e Partisë Demokratike, Jorida Tabaku, ishte e ftuar këtë të enjte në Euronews Now, ku analizoi zhvillimet politike në vend. Tabaku u ndal tek aksioni opozitar në parlament, ku prej disa javësh deputetët e Partisë Demokratike po bllokojnë punimet e seancës plenare përmes kaosit dhe ndezjes së tymueseve.

Tabaku tha se nuk është dakord me këto mënyra se dhe një qëndrim të tillë ia ka shprehur dhe kolegëve si dhe kreut të grupit parlamentar Gazmend Bardhi.

Por megjithatë Tabaku, theksoi se e kupton reagimin e deputetëve në një kohë kur maxhoranca po zbaton tiraninë e shumicës duke bllokuar çdo hapësirë të opozitës në parlament. Ajo shtoi se ndryshimi i rregullores, si dhe ligjit për komisionet parlamentare duhet të realizoheshin konsensus mes palëve.

“Unë nuk jam dakord për këto mënyra, ia kam thënë zotit Badhi, ia kam thënë kolegëve, kemi diskutuar dhe me njëri tjetrin. Ata mendojnë që e vetmja mënyrë për të tërhequr vëmendjen është kjo, e vetmja mënyrë për të thënë që 8 komisione hetimore në një vit e gjysmë janë rrëzuar, e vetmja mënyrë për të thënë që kryetarja e Kuvendit nuk njeh kreun e grupit parlamentar, e vetmja mënyrë për të treguar që e gjithë hapësira parlamentare është e zënë. Çfarë duhet të bëjë opozita kur në mesin e një krize parlamentare ndryshohet rregullorja në mënyrë të njëanshme. Kjo është tirania e shumicës, të uzurpojmë dhe atë hapësirë që kishte opozita në parlament. Në 2013 ka qenë një nga kushtet e integrimit që rregullorja e parlamentit ndryshihet në mënyrë konsensuale, ligji për komisionet hetimore në mënyrë konsensuale, ashtu sikurse dhe Kodi Zgjedhor”, tha Tabaku.

LEXONI GJITHASHTU:

• “Me kë do të kandidoni në 2025-ën, me Berishën apo Bashën?”- Ja si përgjigjet Tabaku
• Tabaku: Fatkeqësi, deputetët e PD e përdorën foltoren për të sulmuar njëri-tjetrin
• A do ta votojë kërkesën e SPAK për Berishën? Flet për herë të parë Jorida Tabaku