Aktakuzë ndaj një personi për dhunën kundër KFOR-it në Zveçan  

Prokuroria Speciale e Kosovës njoftoi se ka ngritur aktakuzë kundër një personi, i cili dyshohet se ka qenë pjesëmarrës në protestën e dhunshme të 29 majit të vitit të kaluar në Zveçan, kur protestuesit serbë u përleshën me paqeruajtësit e misionit të NATO-s në Kosovë, KFOR.

Sipas njoftimit, i pandehuri L.D, dyshohet se ka kryer veprat penale: Sulm ndaj personit zyrtar dhe pjesëmarrje në turmë që kryen vepre penale dhe huliganizëm.

Sipas aktakuzës, L.D më 29 maj të vitit 2023, kishte qenë afër objektit të Komunës së Zveçanit dhe “në koordinim me të pandehur të tjerë të nacionalitetit serb nga Kosova dhe Serbia, përmes përdorimit të dhunës i kanë sulmuar dhe seriozisht i kanë kanosur ushtarët e misionit paqeruajtës të KFOR-it, si dhe disa pjesëtarë të Policisë së Kosovës”.

Prokuroria Speciale po ashtu ka kërkuar nga gjykata që të pandehurit t’i vazhdohet masa e paraburgimit deri në epilogun e çështjes penale kundër tij.

Deri më tani, janë arrestuar disa persona për ngjarjet e 29 majit në Zveçan.

Dhuna në Zveçan kishte shpërthyer pasi serbët lokalë patën kundërshtuar hyrjen e kryetarëve të rinj shqiptarë në ndërtesat komunale në Zveçan, Leposaviq dhe Zubin Potok – komuna në veri të Kosovës, të banuara me shumicë serbe.

Si pasojë e dhunës kishin mbetur të plagosur 93 pjesëtarë të KFOR-it, disa prej tyre rëndë.

Në përvjetorin e sulmit ndaj KFOR-it, më 29 maj ky mision ka kërkuar që të mbahen përgjegjës të përfshirët në sulmin e vitit të kaluar.

Kosova ka fajësuar Serbinë për ngjarjet në Zveçan, duke thënë se ato janë kryer nga “grupe kriminale të afërta me presidentin e Serbisë, Aleksandër Vuçiç”.

Por, Serbia e ka mohuar një akuzë të tillë, duke akuzuar kryeministrin e Kosovës, Albin Kurti, se synonte të shtynte serbët “drejt një konflikti me NATO-n”.

KFOR-i është përgjegjësi i tretë për sigurinë e Kosovës, pas Policisë së Kosovës dhe misionit të Bashkimit Evropian për sundimin e ligjit, EULEX.

LEXONI GJITHASHTU:

• Kosovë| Digjen dy automjete në pronësi të Komunës së Zveçanit
• Policia e Kosovës arreston një të dyshuar për dhunën ndaj trupave të KFOR në Zveçan