Akuzohet për grup kriminal dhe trafik droge, arrestohet për tu ekstraduar 43-vjeçari

43-vjeçari Ergys Lika është arrestuar këtë të diel në saj të operacionit policor “Operacionalja 27”.

Ky person është shpallur në kërkim ndërkombëtar pasi në vitin 2016 Gjykata e Romës në Itali ka caktuar ndaj tij masën e sigurisë “Arrest me burg”, për veprat penale “Organizatë kriminale” dhe “Trafikimi i narkotikëve”, parashikuar nga Kodi Penal i Italisë.

Njoftimi i policisë

Si rezultat i shkëmbimit të informacioneve dhe i koordinimit të punës me homologët italianë, shërbimet e Drejtorisë së Forcës së Posaçme Operacionale (Fast Albania), në kuadër të operacionit “Operacionalja 27”, lokalizuan në Pogradec dhe arrestuan provizorisht shtetasin e shpallur në kërkim ndërkombëtar, E.L., 43 vjeç, banues në Durrës.

Gjykata e Romës/Itali, në vitin 2016, ka caktuar për këtë shtetas masën e sigurisë “Arrest me burg”, për veprat penale “Organizatë kriminale” dhe “Trafikimi i narkotikëve”, parashikuar nga Kodi Penal i Italisë.

Interpol Tirana po bashkëpunon me Interpol Romën për të finalizuar procedurën e ekstradimit të këtij shtetasi në Itali.

LEXONI GJITHASHTU:

• Operacion antidrogë në Tiranë, arrestohet 35-vjeçari për shpërndarje kokaine
• Veliaj ankimon vendimin e Gjykatës për “arrest në burg”, pritet shqyrtimi i kërkesës