Ambasadori amerikan në Serbi: Ia bëmë të qartë Prishtinës, do përballet me pasojat

Ambasadori i Shteteve të Bashkuara të Amerikës në Serbi, Christopher Hill, ka thënë se Kosova do përballet me pasojat për veprimet e Qeverisë së Kosovës në veri të vendit.

“Ne ia kemi bërë shumë të qartë Prishtinës se ne i kundërshtojmë veprimet e Qeverisë Kurti. Sekretari amerikan i Shtetit, Antony Blinken, ka qenë, po ashtu, shumë i qartë se do të ketë pasoja në marrëdhëniet me Prishtinën”,-ka thënë Hill para gazetarëve në Beograd.

Ambasadori amerikan paralajmëroi se nuk duhet të humbet fokusi nga dialogu i Brukselit, themelimi i Asociacionit të komunave me shumicë serbe dhe shtoi se Ballkani Perëndimor duhet të ecë drejt integrimit evropian.

Hill iu referua deklaratave të sekretari amerikan të Shtetit, Antony Blinken, i cili i bëri thirrje edhe Kosovës, edhe Serbisë që t’i kthehen dialogut të ndërmjetësuar nga Bashkimi Evropian, për normalizimin e marrëdhënieve.

Blinken gjithashtu përsëriti më 31 maj se vendimi i Qeverisë së Kosovës për t’i instaluar me forcë kryetarët e rinj në komunat me shumicë serbe në veri, i përshkallëzoi tensionet “në mënyrë të mprehtë dhe të panevojshme”.

LEXONI GJITHASHTU:

• Borrell pas takimit me Kurtin: Situata në Veri e rrezikshme, të ulen tensionet
• “Qëndroi 10 ditë në Beograd”, Noka kërkon llogari nga Begaj për kryetaren e SHISH