AMP arreston 4 punonjës policie në Kapshticë për shpërdorim detyre

Agjencia e Mbikëqyrjes Policore Rajoni Elbasan-Korçë, në bashkëpunim me Prokurorinë e Korçës, ka zbuluar dhe goditur një rast të trafikut të lëndëve narkotike dhe shpërdorimit të detyrës në Pikën e Kalimit Kufitar Kapshticë.

Si rezultat, katër punonjës policie dhe një shtetas civil janë arrestuar, më konkretisht:

• Nën/Komisar Y. D., me detyrë Përgjegjës Turni në Kapshticë;

• Inspektor F. B., Specialist/Kontrollor;

• Inspektor L. H., Trupë Shërbimi;

• Inspektor D. M., Trupë Shërbimi/Kontrollor në dalje, i cili dyshohet gjithashtu për “Prodhim dhe mbajtje të armëve shpërthyese dhe municioneve”;

• Shtetasi V. B., banues në Vërdovë, Pogradec – drejtuesi i automjetit ku u gjet droga.

Hetimet zbuluan se efektivët e policisë nuk kanë ushtruar kontrollin e detyrueshëm ndaj një automjeti që drejtohej nga V. B., ku më pas u zbulua një sasi prej 6 kg e 134 gramë heroine, e fshehur në vende të posaçme.

Gjatë operacionit u sekuestruan edhe:

• 5 telefona celularë,

• 256 fishekë për pistoletë model TT,

• 20 fishekë për armë gjahu,

• si dhe një automjet, që shërbente për transportin e lëndës narkotike.

Materialet proceduriale janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Korçë.

LEXONI GJITHASHTU:

• EMRI/ I vodhi me dhunë çantën një personi, arrestohet autori i grabitjes në Durrës
• Vodhën dy vite më parë 600 mijë lekë të reja, vihen në pranga dy autorët