Analisti Maliqi: VV i ka në rrezik të gjitha komunat e mëdha

Analisti Agon Maliqi duke iu referuar publikimit të exit poll-eve të para për zgjedhjet lokale në Kosovë thotë se vërehet një frymë pozitive për partitë opozitare.

Në komunat e mëdha, z. Maliqi thotë se pritet të ketë një balotazh mes Lëvizjes Vetëvendosje me Partinë Demokratike të Kosovës dhe Lidhjen Demokratike të Kosovës.

“Mund të shkojmë drejt një skenari ku VV i ka në rrezik të gjitha komunat e mëdha. Jemi pranë një skenari ku VV mund të mos jetë fituese në asnjë komunë”, thotë ai duke shtuar se “VV mbetet parti e karakterit kombëtar dhe e temave nacionale”.

Sipas analistit një rezultat i tillë vjen për shkak se në dy partitë kryesore opozitare ka pasur zhvillime pozitive dhe janë paraqitur në zgjedhje me kandidatë cilësorë.

“Dy partitë opozitare kanë ndryshuar lidershpi dhe kanë sjellë kandidatë cilësor. Votuesit sipas të dhënave të exit poll-eve e kanë shpërblyer ndryshimin”, tha Agon Maliqi.