Andoni: Berisha të lërë PD-në, nuk përdor dot alibi ndaj sanksioneve britanike

Analisti Ben Andoni thotë se ish-kryeministri Sali Berisha duhet të lërë drejtimin e Partisë Demokratike, pas shpalljes ‘non grata’ nga Britania e Madhe.

Në një intervistë për “Euronews Albania”, Andoni u shpreh se Berisha duhet të përballet vetë me drejtësinë, teksa shtoi se PD-ja ndodhet para një humnere.

“Mendoj që në këto momente ai realisht duhet t’i hapë rrugë Partisë Demokratike, mjaft e përdori Partinë Demokratike, duhet të përballet vetë me drejtësinë dhe pasojat e saj. Partia Demokratike nuk ndodhet para një kryqëzimi, por para një humnere”, theksoi analisti.

Sipas Andonit, Berisha e ka të vështirë të përdorë një alibi për sanksionet nga Britania e Madhe, sikurse përdori në rastin e SHBA-ve, ku tha se është sponsorizuar nga George Soros.

Andoni nënvizoi se ish-kryeministri po kërkon të bëjë një luftë të pabarabartë me SHBA-të dhe Britaninë e Madhe.

Sali Berisha deklaroi këtë të premte se i është ndaluar hyrja në territorin e Britanisë së Madhe. Sipas tij, vendimi është në vazhdën e shpifjeve të sponsorizuara nga Soros.

Arsyetimi që Berisha kishte marrë për këtë vendimi ishin lidhjet me grupet e krimit të organizuar dhe kriminelë të cilët kanë paraqitur një rrezik për sigurinë publike në Shqipëri dhe Britani dhe korrupsioni.

Pavarësisht se vendimi është konfidencial, Berisha theksoi se e bëri publik për qytetarët shqiptarë me të cilët ka qenë gjithnjë i vërtetë.

LEXONI GJITHASHTU

• Britania e Madhe sanksionon Berishën, Çipa: Goditje edhe për fatin e opozitës
• Për lidhje me krimin s’jam akuzuar as nga kundërshtarët, pretendon Berisha
• Berisha: Më kanë ndaluar hyrjen në Britaninë e Madhe