Anglia U-21 kampione e Europës, mposht Gjermaninë në finale

Anglia është fituesja e Kampionatit Evropian për 21-vjeçarët, pasi mposhti në finale Gjermaninë me rezultatin 3-2 ndërsa ky ishte trofeu i katërt evropian i fituar nga “3 Luanët”.

Finalja e këtij edicioni rezultoi spektakolare, me një lojë të fortë nga të dyja skuadrat. Anglia zhvilloi një ndeshje të shkëlqyer dhe nuk e pa asnjëherë veten në disavantazh, ndonëse përballë kishte një skuadër si Gjermania, e cilësuar si favorite.

Takimi nisi më mirë për anglezët, të cilët gjetën rrugën e rrjetës që në minutën e 5-të me të zakonshmin Harvey Elliot. Pjesa e parë u mbyll me avantazhin e dyfishtë për skuadrën e drejtuar nga Lee Carsley, pasi Hutchinson realizoi golin e dytë.

Fraksioni i dytë foli për “panzerat”, të cilët luajtën më mirë dhe arritën të barazonin me golat e Weiper dhe Nebel. Me rezultatin 2-2 në fund të 90 minutave, u desh koha shtesë për të përcaktuar fituesin.

Në minutën e 92-të, Rowe realizoi golin që i dha fitoren Anglisë. Gjermanët ishin të pafat, duke goditur dy herë traversën, përfshirë edhe në sekondat e fundit të takimit.

Një fitore që ka vlerë të madhe për futbollin anglez, i cili me këtë sukses konfirmon se e ardhmja e “3 Luanëve” është në duar të sigurta.

LEXONI GJITHASHTU:

• Anglia në krye të grupit, merr dhe fitoren e tretë në kualifikuese
• Gjermania dhe Anglia do të përballen në finalen e Kampionatit Evropian U21