Anija me 102 kontejnerë me mbetje futet në portin e Durrësit

Është ankoruar në kalatën nr.7 të portit të Durrësit anija “Moliva”, që në bordin e saj ka 102 kontejnerë të dyshuar me mbetje të rrezikshme.

Puna për shkarkimin e kontejnerëve pritet të nisë që herët në mëngjes dhe procesi i shkarkimit parashikohet të zgjasë rreth 3 orë.

102  kontejnerët me mbetje të rrezikshme, për të cilat prokuroria e Durrësit ka vendosur sekuestrimin dhe ruajtjen nën masa të rrepta sigurie, do të spostohen drejt Porto Romanos në afërsi të EcoPark-ut, ku gjatë këtyre ditëve është krijuar një hapësirë e posaçme.

Transporti me kamion i kontejnerëve do të bëhet po ashtu nën masa të rrepta siguria, si dhe pritet të shoqërohet nga efektivë të forcave të rendit.

Hapësira e dedikuar për vendosjen e kontejnerëve gjatë këtyre ditëve është një pronë e sekuestruar kohë më parë nga AAPSK (Agjencia e Administrimit të Pasurive të Sekuestruara dhe të Konfiskuara).

LEXONI GJITHASHTU:

• “Anija do vijojë në radë”, Prokuroria: Kemi kërkuar ndihmë për analizën e mbetjeve
• Drejtori i Rrjetit të Bazelit: Anija në port me lëndë toksike, çfarë kemi zbuluar