Antonio Albaneze fiton zgjedhjet në Australi

Antonio Albaneze pritet të zgjidhet Kryeministri i ri i Australisë pasi udhëhoqi Partinë e Punës në fitoren e parë në zgjedhje pas thuajse një dekade.

Një nga politikanët më jetëgjatë ka rrëzuar nga pushteti konservatorët, koalicioni i të cilëve ishte në pushtet që prej 2013, shkruan BBC.

Ndërsa kryeministri në largim, Skot Morrison e quan veten “buldozer”, Albaneze shihet si “ndërtuesi”.

Pas pandemisë, e cila e ndau Australinë në qytete të veçuara, bashkimi është një në prioritetet kryesore të liderit të ri.

“Do t’i bashkoj australianët. Do të synoj të realizoj synimin tonë të përbashkët dhe të promovojë bashkimin dhe optimizmin, jo frikën dhe ndarjen”, tha Albaneze në fjalimin e fitores të mbajtur të shtunën në darkë.

Antonio Albaneze ka fituar reputacion si mbrojtës i sistemit shëndetësore pa pagesë dhe është mbrojtës i të drejtave të komunitetit LGBT si dhe një tifoz i pasionuar pas regbisë.

Ai ka lindur më 2 mars 1963 në Sidnej dhe është djali i Karlo Albaneze dhe Marjana Elleri. Nëna e tij ishte me origjinë nga Irlanda kurse babai nga juglindja e Italisë.

Mbiemri i tij lidhet me prejardhje ne babait që i përket arbëreshëve të Italisë. Sidoqoftë, Albaneze nuk e di qartë nëse është me prejardhje shqiptare, shkruhet në përshkrimin e tij në Wikipedia.

Babai i tij vinte nga Barleta, qytet i komunës Apulia që ka një popullsi prej mbi 94 mijë banorë.

Ky rajon njihet për një komunitet të madh arbëresh që besohet se i kalon 100 mijë.

Mbiemri Albaneze vjen nga Albania dhe i vendosej dikujt që vinte nga Shqipëria dhe është i përhapur në disa zona të Italisë si Abruzo, Apulia, Kampania dhe Sicili.

Arbëreshët janë refugjatë shqiptarë që u larguan pasi Ballkani u pushtua nga Otomanët.