Anulimi i seancës plenare, reagon PD: Veprim antikushtetues, dënojmë vendimin

Partia Demokratike ka reaguar pak orë para se presidenti Erdogan të mbërrijë Shqipërinë, për vizitën e të cilit është anuluar edhe seanca e sotme parlamentare.

Sipas PD, ky është një vendim antikushtetues dhe që bie ndesh me çdo parim demokratik të funksionimit të Parlamentit, duke e cilësuar sakaq Kuvendin një tempull të përfaqësimit të qytetarëve, që “nuk mund të trajtohet si qelia e Pëllumb Gjokës”.

PD ka dënuar me forcë sjelljen e Kryetares së Kuvendit Elisa Spiropali, lidhur me shtyrjen e zhvillimit të seancës paralmentare për të enjten e javës që vjen.

Deklarata e plotë:

“Kuvendi i Shqipërisë është institucion kushtetues, që funksionon sipas Kushtetutës dhe Rregullores së Kuvendit. Seanca plenare dhe plani i punës së Kuvendit miratohen nga Konferenca e Kyetarëve me mirëkuptim apo nga seanca plenare, që ka përcaktuar me vendim se dita e enjte, datë 10 Tetor 2024, është ditë për mbledhjen e Kuvendit në seancë plenare. Kryetarja e Kuvendit ka vetëm detyrimin për të caktuar çështjet qe trajtohen, pra Rendin e Ditës.

Anullimi i seancës me vendim personal të Elisa Spiropalit është antikushtetues dhe bie ndesh me çdo parim demokratik të funksionimit të Parlamentit. Kuvendi nuk është qelia personale në burg e Pëllumb Gjokës, që për shkak të lidhjeve me pushtetin, ai e hap e mbyll sa herë dëshiron. Kuvendi është tempulli i përfaqësimit të qytetarëve, që nuk mund të trajtohet kurrë si qelia e Pëllumb Gjokës.

Grupi Parlamentar i Partisë Demokratike dënon me forcë sjelljen e Kryetares së Kuvendit Elisa Spiropali, që hap e mbyll punimet e Kuvendit, pa asnjë konsultim, pa ndjekur asnjë rregull, duke shkelur Kushtetutën dhe Rregulloren e Kuvendit, dhe duke e shndërruar zyrtarisht Parlamentin e Shqipërisë në qelinë personale në burg ku strehohet Pëllumb Gjoka apo të ngjashmit e tij.”

LEXONI GJITHASHTU:

• Ish-drejtues policie kur PD ishte në pushtet drejtuan protestën, e zbulon Ferhati
• “Duan të më arrestojnë”, protestuesi i PD: Policia më terrorizoi nënën