Anulohet shtesa e legalizuar në hapësirë publike në Tiranë, çfarë paralajmëron Rama

Qeveria do të miratojë një reformë të re për kontrollin e territorit, duke marrë shkas nga zaptimi i hapësirave publike me ndërtime pa leje.

Kryeministri Rama, në një postim në Facebook, ka publikuar rastin e një shtese lokali që është legalizuar, sipas tij, në hapësirë publike.

Lidhur me raste të tilla, Rama thotë se do të anulohet ligjërisht legalizimi i këtyre lejeve, si dhe do të nisë hetim penal kundër punonjësve të Kadastrës që kanë zbatuar akte të tilla.

Në foton e publikuar nga Rama në rrjetet sociale, duket rasti i një lokali në Tiranë ku legalizimi i këtij objekti është bërë më datë 12 mars të këtij viti, ndërsa me një vendim të datës së sotme, shtesa e legalizuar e këtij lokali në tokë publike është anuluar nga Agjencia Shtetërore e Kadastrës.

“Për të gjitha këto lloj çmendurish me qëllim fitimi, të cilat kanë marrë dokument legalizimi në hapësirën publike, në kurriz të komunitetit, jo vetëm që do të reagohet me zero tolerancë duke i anuluar ligjërisht, por do të miratohet – si pjesë e reformës së re të kontrollit të territorit – edhe një masë për ndëshkimin penal të të gjithë atyre nëpunësve të Kadastrës që kanë firmosur për këto legalizime kriminale”, shkruan Rama.

LEXONI GJITHASHTU:

• Rama mbërrin me helikopter në Vlorë! Gazetari zbardh detaje nga arsyet e vizitës
• Vizita në Vlorë/ Rama largohet me helikopter, qëndroi disa orë te vilat qeveritare