AP: SHBA pezulloi dërgesën e 3500 bombave në Izrael përpara ofensivës Rafah

Administrata e presidentit amerikan Joe Biden pezulloi dërgesën e rreth 3500 bombave në Izrael javën e kaluar për shkak të shqetësimeve për një ofensivë të mundshme tokësore në Rafah, raporton sot AP, duke cituar një zyrtar të paidentifikuar nga administrata.

Ky zyrtar sqaroi se nuk ishte marrë asnjë vendim përfundimtar për dorëzimin e bombave dhe se dërgesa e pezulluar përfshinte 1800 bomba me peshë 900 kilogramë secila dhe 1700 bomba me peshë 226 kilogramë.

“Meqë udhëheqësit izraelitë dukej se ishin afër një vendimi muajin e kaluar për një operacion të tillë, ne filluam të shqyrtojmë me kujdes transferimet e propozuara të disa armëve në Izrael që mund të përdoren në Rafah”, tha zyrtari.