Apeli i GJKKO e la në burg, reagon për herë të parë Erion Veliaj

Kryebashkiaku i Tiranës, Erion Veliaj, ka reaguar për herë të parë pas vendimit të Apelit të Posçëm për rrëzimin e kërkesës së tij për zëvendësimin e masës së “Arrestit me burg”.

Përmes një postimi në rrjete sociale Veliaj thekson se shpresonte që në Apel të mund të lirohej dhe të ritakohej me djalin e tij.

Kryebashkiaku shton se organi i akuzës i ka ngritur një kurth duke e vënë në përgjime në bisedat që ka pasur në burg me bashkëshorten dhe të vëllanë.

Ai shton se edhe avokati i tij amerikan ende nuk e kupton se pse mbahet në burg pa gjyq.

“I kam shkruar dhe Inspektorit të Lartë të Drejtësisë, por po më duket sikur kam hedhur në det një letër në shishe, që kushedi se në ç’breg të shkretë ka dalë”, shkruan Veliaj, sa i takon pikëpyetjes së nritur për masën e arrestit në burg.

REAGIMI I PLOTË I ERION VELIAJT

Të dashur miq e dashamirës,

Vendimi i sotëm nuk ishte ai që do të doja, po ishte ai që deshën ata që më janë qepur si të isha armiku më i betuar i këtij vendi.

Do të kisha dashur shumë që ta kisha fituar këtë betejë dhe tani të isha duke përqafuar djalin tim, për të cilin më ka marrë shumë malli!

Por, këta më ngritën edhe një kurth, duke më vënë në përgjim bisedat me gruan e me vëllain nga burgu, dhe shfrimet e mia i kthyen në një dosje të re!

E gjitha është si një ëndërr e keqe, si një film sovjetik, me sigurimsa që i qepen robit deri në poshtërim. Po ja që s’është as ëndërr, as film, po është një ngjarje e jetuar në lëkurën e një familjeje për fustanet imagjinare të gruas dhe dosje të stisura qëllimisht për Kryetarin e Bashkisë së Kryeqytetit.

A ka diku dikush që duhet të dëgjojë e të shohë se çfarë lebetie është e gjithë kjo?! Avokati amerikan, që më siguroi im vëlla, nuk arrinte të kuptonte asgjë, pasi më dëgjonte dhe pyeste: “Dakord, po pse në burg pa gjyq?”. I kam shkruar Inspektorit të Lartë të Drejtësisë, por po më duket sikur kam hedhur në det një letër në shishe, që kushedi se në ç’breg të shkretë ka dalë.

Sidoqoftë, ky nuk është fundi dhe s’ka se si të jetë! Luftën për drejtësi do ta vazhdoj e do ta bëj deri në fund, siç ju’a kam premtuar. Sepse gjatë gjithë jetës sime kam treguar se di të ringrihem. Humbjet na bëjnë më të fortë dhe janë preludi i fitoreve.

Uroj të mos bezdis asnjeri nga ju, sidoqoftë me këtë absurdin që po jetoj unë dhe familja ime. Por, kjo është realisht çnjerëzore.

Faleminderit për çdo mesazh inkurajues e për çdo mbështetje zemre.

LEXONI GJITHASHTU:

• Veliaj në Apelin e GJKKO: SPAK ka përgjuar telefonatat me familjarët e mi
• Veliaj mbërrin në GJKKO për të kërkuar “lirinë”, SPAK paraqiti prova të reja