Sekretari i përgjithshëm i NATO-s ka ftuar anëtarët e Aleancës që furnizojnë me armë Ukrainën që të lejojnë përdorimin e tyre për të goditur objektiva ushtarake në Rusi.

Lajmin e bën të ditur e përjavshmja “The Economist”, që ka intervistuar Jens Stoltenberg.

Sipas gazetës, objektivi i Stoltenberg, edhe pse nuk është përmendur, është politika e presidentit të Shteteve të Bashkuara, Joe Biden për të kontrolluar se çfarë Ukraina mund dhe nuk mund të sulmojë me sistemet amerikane.

Lajmi vjen një ditë pasi agjencia “Reuters” raportoi se presidenti rus Vladimir Putin ishte i gatshëm të ndalonte luftën në Ukrainë me një armëpushim të negociuar, “që të njohë vijat aktuale të fushës së betejës”.

“Reuters” citonte katër burime zyrtare ruse, tre prej të cilave kishin njohuri mbi bisedimet e kabinetit të Putin.

Sipas këtyre të fundit, lideri rus i kishte shprehur “frustrimin” e tij një grupi të vogël këshilltarësh për ato që i quan tentativat e mbështetura nga Perëndimi për të penguar negociatat dhe vendimin e presidentit ukrainas Volodymyr Zelensky për të mos pranuar bisedimet.

LEXONI GJITHASHTU:

• Shtetet e NATO-s në kufi me Rusinë do të ndërtojnë “mur me dronë”
• Kremlini paralajmëron NATO: Kujdes, po ju vëzhgojmë