Arrestimet në doganën e Kakavijës, Gjykata jep masat e sigurisë

Gjykata e Gjirokastrës caktoi masat e sigurisë për 2 doganierët e doganës së Kakavijës dhe 6 personat e tjerë të arrestuar 3 ditë më parë për kalimin e mallrave kontrabandë.

Prokuroria Gjirokastër, kërkoi vlerësimin si të ligjshëm të arrestimit të shtetasit, A.A i dyshuar për kryerjen e veprës penale “Kontrabanda nga punonjës që lidhen me veprimtarinë doganore”, parashikuar nga neni 175 i KP. Të caktohet ndaj tij masa e sigurimit personal me karakter shtrëngues “Garanci pasurore” në vlerën 10.000 Euro dhe “Ndalimi i daljes jashtë shtetit”, parashikuar nga nenet 233 dhe 236 të KPP. Vlerësimin si të ligjshëm të arrestimit të shtetasit E.Shi dyshuar për kryerjen e veprës penale “Kontrabanda nga punonjës që lidhen me veprimtarinë doganore”, parashikuar nga neni 175 i KP. Të caktohet ndaj tij masa e sigurimit personal me karakter shtrëngues “Garanci pasurore”, në vlerën 7.000 Euro dhe “Ndalimi i daljes jashtë shtetit”, parashikuar nga nenet 233 dhe 236 të KPP.

Gjykata dha të njëjtin vendim edhe për 6 personat e tjerë të kapur me mall kontrabandë në gjykatën e Kakavijës për të cilët caktoi masë e sigurimit personal me karakter shtrëngues “Garanci pasurore” në vlerën 5.000 euro dhe “Ndalimi i daljes jashtë shtetit”.

2 doganierë të pikës së kalimit kufitar të Kakavijës u arrestuan 3 ditë më parë dhe 4 të tjerë janë shpallur në kërkim, pasi lejuan kalimin e 4 kamionëve të tonazhit të rëndë me mallra kontrabandë.

LEXONI GJITHASHTU:

• Lejuan futjen e mallrave kontrabandë në Kakavijë, në pranga 2 doganierë, 4 në kërkim
• Arrestime në doganën e Kakavijës për abuzime me detyrën dhe korrupsion