Arrestimi i Breçanit, Berisha: S’ka qenë kurrë afër meje, në bulevard nuk bëri asgjë

Ish-kryeministri Sali Berisha është shprehur se nuk e ka njohur Erzen Breçanin (i arrestuar nga SPAK) gjatë kohës që ai ka qenë në Polici.

Komentet Berisha i bëri në emisionin “Now me Erla Mëhillin” në Euronews Albania, ku tha se Breçani nuk ka qenë kurrë afër tij, por vetëm ka qenë një mbështetës i opozitës.

Ndërsa kur u pyet për momentin e sulmit me grusht në bulevard, Berisha tha se Breçani nuk bëri asgjë tjetër, veçse e shpëtoi agresorin nga dhuna e ushtruar nga badigardët e tij.

Pjesë nga diskutimi në studio:

Pyetje: Së fundi SPAK ka arrestuar një nga njerëzit që ka qenë më afër teje, Erzen Breçanin, keni një koment për këtë?

Berisha: S’ka qenë kurrë më afër meje, e kam njohur kur ka lënë Policinë, kur ka qenë në Polici nuk e kam njohur fare. Ka qenë mbështetës i opozitës, i djathtë dhe nuk e kam njohur. Kam atë komënt që kam bërë edhe mbrëmë. Jam për ligjin dhe vetëm ligjin.

Pyetje: Pra në rastin e Breçanit ju keni lënë drejtësinë?

Berisha: Ligjin thashë, jo drejtësinë. Janë dy gjëra të ndryshme, do shohim.

Pyetje: Megjithatë Breçani ka qenë më afër jush kur ishte momenti i sulmit me grusht në bulevard.

Berisha: Ai e shpëtoi atë, e shpëtoi agresorin se asgjë tjetër nuk bëri. Ja u nxori se ata po e dëmtonin shumë.

LEXONI GJITHASHTU:

• ‘I izoluar’ nga SHBA dhe MB, Berisha: Rruga e komunikimit të PD me ndërkombëtarët
• Marrëveshja për emigrantët, protestë në Lezhë. Ish-prefekti: Sjell telashe