Arrestimi i Metës në lajmet ndërkombëtare, bën ‘xhiro’ në Itali dhe mediat anglofone

Nuk ka vonuar shumë dhe lajmi për arrestimin e Ilir Metës ka bërë xhiron e mediave ndërkombëtare. Të parat që kanë raportuar vënien e tij në pranga kanë qenë ato italiane.

“Arrestohet ish-presidenti i Republikës së Shqipërisë, Ilir Meta”, është titulli i agjencisë së lajmeve “ANSA”.

Agjencia e vë theksin tek fakti se, që prej viteve ’90, Meta ka mbajtur postet më të larta të shtetit, atë të kryeministrit, presidentit, kryetarit të Parlamentit dhe ministrit të Jashtëm.

Në faqe të parë, por jo në plan të parë, lajmi mbi kryetarin e Partisë së Lirisë ka zënë vend edhe tek edicioni online i së përditshmes “La Repubblica”. Gazeta vë në dukje se vënia e tij në pranga vjen në një kohë kur e gjithë vëmendja ndërkombëtare është mbi Shqipërinë, për shkak të marrëveshjes Rama-Meloni për emigrantët.

Edhe Rainews ka shkruar për arrestimin e Metës nga Gjykata e Posaçme kundër Korrupsionit dhe Krimit të Organizuar. Edhe portali në fjalë e vë theksin tek postet e rëndësishme që ka mbajtur kryetari aktual i Partisë së Lirisë.

Pasqyrim është bërë edhe në media të tjera italiane, si “Il Fatto Quotidiano”, “Tgcom” e të tjera.

Nga mediat anglofone, “Balkan Insight” i ka vënë lajmit titullin “Ish-presidenti i Shqipërisë Ilir Meta arrestohet për korrupsion”. Sipas agjencisë së lajmeve, ish-kreu i qeverisë dhe i shtetit ra në pranga edhe për pastrim parash dhe mosdeklarim të aseteve të ij.

Edhe “ABC Neës” raportoi lajmin duke u fokusuar po ashtu tek akuzat që rëndojnë ndaj ish-kreut të shtetit, mes të cilave spikat ajo për pastrim parash.

LEXONI GJITHASHTU:

• Arrestimi i Ilir Metës, reagon Ervin Hoxha: Policia u detyrua të përdorte forcën
• “Show i panevojshëm”, Ish-Prokurori për arrestimin e Metës: Mund të ishte kursyer…