Arrestimi ish-policit nga Kosova në Serbi, reagon Albin Kurti

Kryeministri në detyrë i Kosovës, Albin Kurti, ka reaguar ashpër ndaj arrestimit të Arbnor Spahiut, ish-pjesëtar i Njësisë Speciale të Policisë së Kosovës, nga autoritetet serbe në pikën kufitare ndërmjet Hungarisë dhe Serbisë më 7 qershor 2025. Në një postim në Facebook, Kurti tha se kjo është një tjetër akt i papranueshëm i Serbisë dhe theksoi se “sjellja jonormale e Serbisë ndaj qytetarëve të Republikës së Kosovës, nuk duhet dhe nuk do të pranojmë të normalizohet.”

Spahiu po udhëtonte me familjen e tij, duke u kthyer nga Austria përmes Serbisë, kur u arrestua. Më 9 qershor, ai u paraqit para gjyqtarit të procedurës paraprake në Gjykatën e Qarkut në Suboticë, ku iu caktua masa e paraburgimit prej 30 ditësh.

Sipas deklaratave të familjarëve dhe avokatit të tij mbrojtës, akuzat ndaj Spahiut lidhen me ngjarjet e Banjskës, megjithëse ai ka përfunduar shërbimin në Policinë e Kosovës që në vitin 2022 dhe prej asaj kohe jeton në Gjermani me familjen. Ata i konsiderojnë akuzat tërësisht të pabazuara dhe të fabrikuara.

Ministria e Punëve të Jashtme dhe Diasporës ka konfirmuar se po ndjek me vëmendje të shtuar rastin dhe ka njoftuar partnerët ndërkombëtarë, përfshirë vendet e QUINT-it. Gjithashtu, Zyra Ndërlidhëse e Kosovës në Serbi ka dorëzuar kërkesë zyrtare për të lejuar Ambasadorin Jetish Jashari të vizitojë Spahiun në qendrën e paraburgimit në Suboticë.