Policia e Shkodrës ka arrestuar 24-vjeçarin e plagosur me armë zjarri në këmbë, në ngajrjen e ndodhur në qytetin verior më datën 23 dhjetor.

Sipas uniformave blu, 23-vjeçari nuk bashkëpunoi me hetuesit duke mos dhënë deklarime të plota për rrethanat e ngjarjes dhe autorin që e plagosi.

Pas hetimeve, policia zbuloi se ishte shoku i 24-vjeçarit, personi i cili e plagosi aksidentalisht dhe kjo ishte arsyeja pse i riu po mundohej të fshihte ngjarjen.

Organet ligjzbatuese kanë shpallur në kërkim autorin 22-vjeçar, ndërkohë që po vijon puna për zbardhjen e plotë të rrethanave të ngjarjes.

“Specialistët për Hetimin e Krimit në Komisariatin e Policisë Shkodër bënë arrestimin e shtetasit A. B., 24 vjeç, për veprën penale “Moskallëzimi i krimit”. Gjatë procesit hetimor, i plagosuri nuk bashkëpunoi plotësisht me autoritetet, duke mos dhënë informacion të mjaftueshëm mbi rrethanat dhe personin e dyshuar si autor të plagosjes.

Ndërkohë, Policia ka shpallur në kërkim shtetasin E. Sh., 22 vjeç, i cili dyshohet se ka plagosur shokun e tij nga pakujdesia. E. Sh. akuzohet për veprat penale “Mbajtja pa leje dhe prodhimi i armëve, armëve shpërthyese dhe i municionit” dhe “Plagosja e rëndë nga pakujdesia”.

Policia vijon operacionin për kapjen e 22-vjeçarit, ndërsa materialet procedurale i janë dorëzuar Prokurorisë për veprime të mëtejshme ligjore”, njofton policia.

LEXONI GJITHASHTU:

• Plagosje me armë zjarri në Shkodër, detajet e para
• Milano, sherri mes shqiptarëve përfundon me plagosje aksidentale