Arrestohet 39-vjeçari shqiptar në Greqi, i kërkuar për trafik të 500 kg kokainë

Policia greke ka vënë në pranga një shtetas 39-vjeçar shqiptar, i cili ishte shpallur në kërkim dhe ndaj tij ishte lëshuar një urdhër ndërkombëtar arresti nga autoritetet belge. I arrestuari është identifikuar si Osmen Hoxha, banues në Qendër të Fierit.

Sipas njoftimit të policisë greke, operacioni u krye nga oficerët e Nëndrejtorisë së Narkotikëve pranë Drejtorisë Kundër Krimit të Organizuar. Mediat greke raportojnë se arrestimi lidhet me hetimet e një organizate kriminale me bazë në Belgjikë, e dyshuar për trafik ndërkombëtar droge.

Hetuesit belgë dyshojnë se grupi trafikonte sasi të mëdha kokaine nga Amerika e Jugut drejt vendeve të ndryshme evropiane, si dhe merrej me kultivimin e plantacioneve të marijuanës dhe funksionimin e impianteve të përpunimit të drogës jashtë territorit belg.

Në kuadër të këtij operacioni, në shtator të vitit 2024, në portin e Antëerpit u sekuestrua një kontejner me rreth 500 kilogramë kokainë.

I arrestuari është dërguar në Prokurorinë Publike kompetente në Greqi, ku është caktuar masa e paraburgimit. Autoritetet vazhdojnë hetimet për zbardhjen e plotë të rastit.

LEXONI GJITHASHTU:

• Humb jetën në shkollë 13-vjeçarja në Greqi, dyshohet se u mbyt me ushqim
• Vrasja e 58-vjeçarit në Greqi, dhuna e shqiptarit u filmua nga kamerat e sigurisë