Arrestohet hajduti serial në Sarandë, në shenjestër kishte automjetet e turistëve

Një 29-vjeçar me banim në Berat është arrestuar nga Policia e Sarandës, pasi dyshohet si autor i një sërë vjedhjesh të ndodhura në automjete të parkuara në qytet, kryesisht të turistëve.

Sipas policisë, rasti i fundit i vjedhjes u regjistrua më 19 qershor 2025, në lagjen nr. 1 të Sarandës, ku shtetasi me iniciale K. S. u kap në flagrancë, pasi kishte marrë një shumë parash nga një çantë e lënë në një automjet.

Nga hetimet paraprake rezulton se një ditë më parë, më 18 qershor, në të njëjtën lagje, ai dyshohet se kishte kryer një tjetër vjedhje, duke marrë 114 000 lekë nga një automjet tjetër.

Burimet policore bëjnë me dije se 29-vjeçari kishte si objektiv çantat e lëna në mjetet e turistëve, duke synuar marrjen e parave dhe sendeve me vlerë.

Materialet në ngarkim të të dyshuarit i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Sarandë, për vijimin e hetimeve dhe veprimeve të mëtejshme procedurale.

LEXONI GJITHASHTU

• VIDEO/ Dy orë ndjekje, hajdutët kapen pasi përplasen me makinën e policisë në Tiranë
• Goditja grupit që shiste drogë në lokalet e Tiranës, lihen në burg 22 të arrestuarit