EMRI| Arrestohet në Rinas i shumëkërkuari nga operacioni “Plumbi i artë”

Është arrestuar në aeroportin e Rinasit avokati Alban Bengasi, i shpallur në kërkim pas operacionit “Plumbi i artë” dhe dëshmisë së dhënë nga Nuredin Dumani.

Shkalla e parë e GJKKO i ka caktuar këtij shtetasi masën e sigurisë “Arrest në burg”, mbi dyshime për përfshirje në veprimtari kriminale kundër personit dhe në fushën e krimit të organizuar.

Sipas dëshmive të të penduarit të dejtësisë, Nuredin Dumani, avokati Bengasi i ka ofruar 120 mijë euro për të vrarë ish-gruan e tij. Atentat i cili nuk u krye nga Dumani.

Materialet procedurale në ngarkim të avokatit i kaluan SPAK-ut, për veprime të mëtejshme.

“Në hyrje, në aeroportin e Rinasit, gjatë përpunimit të dokumentacionit të pasagjerëve, shërbimet e Policisë kanë identifikuar dhe ndaluar shtetasin A. B.

Ndaj këtij shtetasi, Gjykata e Posaçme e Shkallës së Parë për Korrupsionin dhe Krimin e Organizuar,  ka caktuar masën e sigurisë “Arrest në burg”, mbi dyshime për përfshirje në veprimtari kriminale kundër personit dhe në fushën e krimit të organizuar”, njofton policia.