Arsenal “dorëzohet” në Portugali, Napoli-Barcelona pa fitues

E mërkura ka regjistruar një rezultat surprizë në Ligën e Kampionëve, pikërisht ai i përballjes së luajtur në Dragao mes Portos dhe Arsenalit. Vendasit arritën të marrin një fitore me shumë vlerë ndaj ekipit londinez në shifrat 1-0, ndërsa gjithçka u zgjidh në limite. Londinezët zhvilluan një lojë duke qarkulluar më tepër topin, por rastet e pastra i pati Porto, të cilat u shpërdoruan dhe në fraksionin e parë. Edhe në fraksionin tjetër panorama ishte e njëjtë, me miqtë të cilët tentonin, por pa sukses.

Goli i vetëm i sfidës do të ishte spektakolar, i shënuar nga Galeno me një predhë nga distanca, me topin që u ndal në rrjetë. Fitore minimale që vlen shumë për Porton, që do të udhëtojë drejt Londrës me një avantazh minimal. Në përballjen tjetër të luajtur në Champions, Barcelona nuk shkoi më tepër se një barazim me Napolin në transfertë, me miqtë të cilët shënuan të parët, por u barazuan nga të besuarit e Calzonës.

Katalanasit luajtën më mirë, sidomos gjatë pjhesës së parë, por 45 minutat u mbyllën me rrjeta të paprekura. Me nisjen e pjesës së dytë Barcelona u tregua më kërkuese dhe gjeti golin me bomberin Lewandowski me këtë të fundit që goditi saktë në hyrje të zonës së rreptësisë duke ndalur sferën në rrjetë. Osimhen riktheu ekuilibrat, kjo pas një vendosje jo të mirë të mbrojtjes blaugrane, duke bërë që rezultati përfundimtar të ishte 1-1.

LEXONI GJITHASHTU:

• Interi triumfon ndaj Atletikos në Champions, PSV-Dortmund nuk ka fitues
• Rezultatet e Champions: Manchester City bën detyrën, Reali fitore mes polemikash