Arsenali nis merkaton, londinezët përforcojnë sulmin

Merkatoja verore pritet të jetë e zjarrtë sa i përket transferimit të disa nga yjet e futbollit evropian. Një prej emrave më të përfolur është ai i sulmuesit serb, Dusan Vlahovic. 23-vjeçari është në orbitën e disa klubeve, ndërsa kërkohet me ngulm nga Bayerni i Mynihut, Reali i Madridit dhe Newcastle.

Sipas asaj që raportojnë mediat britanike, duket se ylli i Juventusit nuk ka ndërmend të qëndrojë më tepër tek bardhezinjtë, madje as në kampionatin Italian. Vlahovic i ka shkelur syrin drejtuesve të Arsenalit, duke treguar qartë se destinacioni i tij do të jetë Londra. Më tej thuhet se topçinjtë nuk e kanë aspak problem që të paguajnë 100 mln euro për Vlahovic, teksa skuadra pritet të përforcohet edhe më tepër në rast të fitimit të kampionatit, diçka që duket e mundur me formën që po kalojnë.

Vlahovic u transferua në vitin 2022 tek Juventusi, aty ku në 34 ndeshje numëron 15 gola. Më parë sulmuesi ka veshur dhe fanellën e Fiorentinës në 4 sezone, ndërsa është një produkt i akademisë së Partizanit të Beogradit.

LEXONI GJITHASHTU:

• Man City përmbys Liverpoolin, Arsenali regjistron fitoren e 23-të në kampionat
• Nelson “nderon” Arsenalin, Manchester City vijon ndjekjen