Artisti britanik Banksy risjell momentin e Lindjes së Krishtit me instalacionin e tij “Shenja e Betlehemit”

Artisti britanik Banksy ka risjellë në jetë një prej momenteve më të rëndësishme të festave të fundvitit, Lindjen e Krishtit.

Në një mënyrë shumë origjinale ai ka shfaqur veprën e tij në një hotel në Betlehem në Bregun Perëndimor, e hapur nga artisti në vitin 2017.

Sipas artistit ai është munduar ta risjellë këtë moment duke e modifikuar artistikisht për të përcjellë edhe një mesazh tek njerëzit.

E titulluar “Scar of Betlehem” (Shenja e Betlehemit), në vepër shfaqet skena në miniaturë e Jezusit, Marias dhe Jozefit e punuar në pengesën e betonit të Izraelit në Bregun Perëndimor.

Një mur i cili ringjall të gjitha muret dhe pengesat në botë, rrugët e bllokuara për refugjatët. Por tani në këtë mur janë gdhendur në anglisht dhe frengjisht mesazhe të paqes dhe dashurisë. Përmes tyre, artisti jep një mesazh shprese: “Mes murit qëndron edhe një yll, sepse edhe muret rrëzohen, herët a vonë”.

Poshtë skenës, në miniaturë mund të shihen edhe tre dhurata të mëdha.

Menaxheri i hotelit ku ndodhet vepra shprehet se Banksy ka përdorur historinë e Krishtëlindjes për të treguar sesi po jetonin palestinezët në Bregun Perëndimor.

“Ishte një mënyrë e shkëlqyeshme për të sjellë historinë e Betlehemit, historinë e Krishtëlindjes, në një tjetër mënyrë  – për t’i bërë njerëzit të mendojnë më shumë,” tha ai.