Asgjësohen mbi 8 mijë rrënjë kanabis në Shkodër, procedohen 5 kryetarë fshatrash

Policia e Shkodrës ka gjetur dhe asgjësuar 8028 bimë të dyshuara narkotike kanabis sativa dhe ka proceduar 5 kryetarë fshatrash lidhur me këtë veprimtari të jashtëligjshme.

Në kuadër të operacionit të koduar “Koordinata”, në territorin e njësive administrative Pult dhe Shosh, shërbimet e Komisariatit të Policisë Shkodër gjetën dhe asgjësuan 7073 bimë të dyshuara narkotike cannabis sativa.

Në vijim të veprimeve procedurale, u referuan materialet në Prokurori, ku nisi procedimi në gjendje të lirë për veprën penale “Shpërdorimi i detyrës”, për kryetarin e fshatit Ndrejaj, shtetasin N. V.; për kryetarin e fshatit Lekaj, shtetasin P. S.; për kryetarin e fshatit Nicaj, shtetasin V. V.; për kryetarin e fshatit Plan, shtetasin N. Sh.; dhe për veprat penale “Shpërdorimi i detyrës” dhe “Moskallëzim krimi”, për kryetarin e fshatit Kir, shtetasin P. H.

Në territorin e njësisë administrative Kelmend, shërbimet e Komisariatit të Policisë Malësi e Madhe gjetën dhe asgjësuan 780 bimë të dyshuara narkotike kanabis sativa.

Në territorin e njësisë administrative Temal, shërbimet e Komisariatit të Policisë Vau i Dejës gjetën dhe asgjësuan 175 bimë të dyshuara narkotike kanabis sativa.

Vijon puna për identifikimin, kapjen dhe vënien para përgjegjësisë penale të autorëve të kultivimit të bimëve narkotike.

LEXONI GJITHASHTU:

• EMRI| Shiste kokainë dhe kanabis në lokalet e Korçës, arrestohet 34-vjeçari
• Asgjësohen mbi 9,300 bimë kanabisi në Shkodër, shpallen në kërkim autorët