Astrit Kalaja do nderohet me një minutë heshtje në Kuvend, opozita kërkon debat

Të enjten do të zhvillohet seanca e radhës në Kuvendin e Shqipërisë. Seanca do të nisë me një minutë heshtje në nder të qytetarit Astrit Kalaja, i cili u vra në sallën e gjyqit.

Opozita ka paralajmëruar kërkesë për debat në lidhje me sigurinë në ambientet gjyqësore.

Në rendin e ditës janë përfshirë raportimet e institucioneve si AKEP, ERE dhe ERRU për veprimtarinë e tyre gjatë vitit 2024. Po ashtu, parashikohet zhvillimi i debatit dhe drejtimi i pyetjeve nëse do të kërkohet nga deputetët. Në orën 09:30, përpara fillimit të seancës, do të mblidhet Konferenca e Kryetarëve për të përcaktuar kohëzgjatjen dhe mënyrën e zhvillimit të debatit për këto raportime.

Seanca do të hapet me raportimin e Autoritetit të Komunikimeve Elektronike dhe Postare (AKEP) për vitin 2024 nga drejtuesi Gentian Sala (20 minuta). Më pas, do të lexohet dhe votohet projektrezoluta përkatëse nga Komisioni për Burimet Natyrore, Infrastrukturën dhe Zhvillimin e Qëndrueshëm dhe Komisioni për Nismat Qytetare, Bashkëpunimin dhe Mbikëqyrjen Institucionale.

Komisioneri Besnik Dervishi do të paraqesë raportin vjetor të Komisionerit për të Drejtën e Informimit dhe Mbrojtjen e të Dhënave Personale (KDIMDP). Pas prezantimit, do të paraqitet dhe votohet projektrezoluta nga Komisioni për Drejtat e Njeriut dhe Mjetet e Informimit Publik, së bashku me Komisionin për Nismat Qytetare, Bashkëpunimin dhe Mbikëqyrjen Institucionale.

Kryetari i Entit Rregullator të Energjisë (ERE), Petrit Ahmeti, do të raportojë për veprimtarinë e këtij institucioni gjatë vitit 2024. Pas raportimit, do të lexohet dhe votohet projektrezoluta përkatëse nga dy komisionet përkatës.

Në fund, pritet të paraqitet edhe raporti vjetor i Entit Rregullator të Ujit (ERRU) nga kryetarja e Komisionit Rregullator, Gerta Lubonja. Komisionet përkatëse do të paraqesin dhe votojnë projektrezolutën për këtë institucion.