Në kuadër të 70-vjetorit të lindjes së At Spiro Katundit, u mbajt një koncert i veçantë në teatrin “Andon Zako Çajupi” të Korçës.

“Koncert me dashurinë tuaj” ishte një pasqyrë e emocionit dhe gëzimit, ku, përveç miqve që ndanë skenën, u prezantua një repertor i pasur me një gamë të gjerë këngësh.

At Spiro Katundi, një klerik fetar, është i njohur për dashurinë e tij të thellë për Zotin, këngën, serenatën dhe Korçën, një lidhje që ai e konsideron të pandarë.

Festimi i 70-vjetorit të lindjes së tij u bë me një koncert të veçantë, ku morën pjesë figura të shumta të shquara të artit dhe kulturës.

Artisti që u bë prift tregon se jeta e tij është e lidhur ngushtë mes fesë dhe këngës, ndaj emocionet në këtë koncert ishin të mëdha.

Miqtë që kanë kënduar me të, ata që kanë interpretuar tekstet e Spiros, dhe aq më tepër kolegët e zemrës, u bashkuan në këtë koncert.

Mes tyre nuk mund të mungonin emra të njohur të muzikës, si Bashkim Alibali, Liljana Kondakçi dhe Myfarete Laze.

At Spiro Katundi ka në repertorin e tij mbi 60 këngë dhe mban autorësinë e dhjetëra këngëve që janë interpretuar në Festivalin Kombëtar gjatë viteve.

LEXONI GJITHASHTU:

• Korça mbyll me sukses Olimpiadën Matematikore të 19-të Ballkanike Studentore
• Publikohet lista e kandidatëve të PD për qarqet Korçë, Vlorë dhe Elbasan