Olimpiada Matematikore e 19-të Ballkanike Studentore është mbajtur për herë të parë në Shqipëri dhe ka përfunduar me sukses në qytetin e Korçës.

Ky aktivitet është organizuar nga Shoqata e Matematikës në Europën Juglindore dhe ka mbledhur 111 studentë nga 27 universitete të ndryshme, përfshirë Shqipërinë, Greqinë, Maqedoninë e Veriut, Bullgarinë, Rumaninë dhe Turkmenistanin.

Kryetari i Shoqatës Shqiptare të Matematikës, Ardian Naço u shpreh se organizimi i kësaj olimpiade ka qenë një sfidë e madhe, por njëkohësisht një mundësi e shkëlqyer për të promovuar arritjet në fushën e matematikës.

I pyetur mbi nivelin e studentëve shqiptarë në këtë olimpiadë, Naço theksoi rëndësinë e pjesëmarrjes së vazhdueshme në aktivitete ndërkombëtare të tilla për të përmirësuar cilësinë dhe nivelin e konkurrencës.

Një pjesëmarrës nga Turqia, Oguz Han, i cili është student ekselent dhe ka marrë pjesë në disa olimpiada të ngjashme, tha se është habitur nga niveli i lartë i studentëve shqiptarë. Ai theksoi se mikpritja që iu ofrua ishte shumë e ngrohtë dhe se zgjuarsia e të rinjve shqiptarë është për tu vlerësuar.

Oguz Han, student nga Antalya u shpreh se kjo ishte hera e tij e parë që vizitonte Shqipërinë dhe, ndonëse ka marrë pjesë në shumë olimpiada ndërkombëtare, është mahnitur nga mundësitë dhe niveli i arritjeve të studentëve shqiptarë.

Në një ceremoni të veçantë që u mbajt mbrëmjen e së shtunës në teatrin “Andon Zako Çajupi” në Korçë, u shpërndanë dhe medaljet për studentët më të mirë të olimpiadës ndërsa asnjë nga studentët tanë nuk arriti të merrte një të tillë.