Atentati në Shkodër/ Policia zbulon armët e përdorura nga autori gjatë atentatit

Në kuadër të hetimeve për masakrën e ndodhur në Shkodër, policia ka dhënë detaje zyrtare për armët dhe mjetet që përdori 29-vjeçari Ragip Gila, i cili u arrestua menjëherë pas ngjarjes.

Gjatë kontrollit, efektivët gjetën tek autori një automatik dhe një pistoletë me fishek në fole, të cilat ai i përdori gjatë sulmit ndaj lokalit pranë Bashkisë së Shkodrës. Një element i pazakontë ishte skafandra që mbante në kokë në momentin e sulmit, e cila u sekuestrua po ashtu nga policia.

Në ngarkim të autorit u gjet edhe një jelek antiplumb, si dhe një shishe 1.5 litra e mbushur me benzinë, që tregon se plani i tij ishte të digjte mjetin tip BMW ngjyrë gri, të cilin e grabiti për t’u arratisur.

Policia zbuloi gjithashtu dhe një motor pa targë dhe numër shashie, i cili u përdor për transport në vendin e ngjarjes.

Hetimet vazhdojnë për të zbardhur plotësisht dinamikën e ngjarjes dhe motivet e autorit.

LEXONI GJITHASHTU:

• Publikohen pamjet, policia filmoi momentin e arrestimit të atentatorit në Shkodër
• “900 plumba në minutë”, Karamuço zbulon armën e përdorur në masakrën e Shkodrës