Avioturizmi rrit interesimin për të vizituar qytetin e gurtë të Gjirokastrës

Zhvillimi i avioturizmit po nxit interesimin e turistëve për të vizituar Gjirokastrën. Tashmë aeroporti turistiko-sportiv i qytetit është kthyer në qendër për nxitjen e avioturizmit dhe sporteve të ajrit. Përgjatë fundjavës avionë sportivë kanë sjellë në fluturime direkte turistët nga Italia. Të shumtë kanë qenë edhe të apasionuarit e sporteve të ajrit që janë përfshirë në hedhjet me parashutë dhe skydiving.

“Fluturimi shkoi shumë mirë si gjithmonë, është hera e tretë që ndodhem në Gjirokastër dhe është kënaqësi, fluturimi është i mrekullueshëm ajo që shikojmë nga lart nga avioni është mbresëlënëse”, tha Alesandro Romanaci Carducci, Presidenti i Aeroclub Bari.

“Fluturimi ishte i mrekullueshëm, është kënaqësi të vizitosh vendin tuaj, me të vërtetë Shqipëria është një vend mikpritës”, u shpreh një turiste.

“Është një aktivitet në funksion të dy elementëve, elementi i parë ka të bëjë me promovimin e aviacionit civil në Shqipëri dhe elementi i dytë është për promovimin e turizmit në Shqipëri, pra kjo fushë ajrore sot mundëson një aktivitet të hedhjes me parashutë dhe i jep mundësi edhe turistëve që janë në qytet të shikojnë aktivitete të larmishme në Gjirokastër dhe e dyta dhe i jep mundësi parashutistëve që të shikojnë bukuritë e vendit”, theksoi Maksim Ethemaj, Drejtor i Aviacionit Civil Shqiptar.

Tashmë krahas vlerave historike dhe ndërtimore Gjirokastra ofron për vizitorët edhe eventet e avioturizmit duke e bërë më tërheqës qëndrimin në qytetin e gurtë.