Balkan Talks/Drejtori i ‘Sbunker’, Maliqi: Pozita e presidentit është thelbi i fushatës

Menjëherë pasi u vendos që Kosova do shkonte në zgjedhje parlamentare, partitë politike në Kosovë publikuan listat me kandidatë, por znj. Donika Emini, drejtore e ‘Civikos’ shprehet se këto lista janë të brishta.

“Pushteti po shkon te Vetëvendosja dhe ka oportunizëm politik që ka njerëz që duan pushtet dhe ndërrojnë partitë politike. Te Vetëvendosja orientimi është i majtë dhe tani te lista ka dhe të djathtë, ekstremistë, pra njerëz që mbledhin vota. Kjo mund të sjellë një keqmenaxhimi të rritjes dhe kjo do sjellë vështirësi”, – thotë drejtore e ‘Civikos’.  

Zonja Emini ndalet dhe te 50 ditët e qeverisjes së z. Kurti, të cilat ajo i quan një mësim për të.

“Ishin shumë pak ditë dhe Kurti mori një mësim, jo çdo gjë që është ndërtuar është e keqe. Komunikim i tij ishte shumë i keq se ka tendenca autoritare, por ka qenë në rrugë të mirë se filloi vettingun”, – shprehet znj. Emini.

Ndërkohë z. Agon Maliqi themelues dhe drejtues i platformës ‘Sbunker’ mendon se fushata tani po zhvillohet për pozicionin e presidentit.

“Mendoj që pozita e presidentit është thelbi i fushatës dhe të thellësia e fitores, pasi duhen 80 vota për presidentin.

Vetëvendosja nuk e arrin këtë numër vetë dhe do i duhet një koalicion me LDK-në ose PDK-në. Nëse kjo nuk arrihet, mund të shkojmë sërish në zgjedhje”, – shprehet drejtori i ‘Sbunker’.

Gazetari Franko Egro pyeti znj.Emini se si e sheh ajo një koalicion Vetëvendosje dhe AAK, dhe përgjigjja e saj ishte se janë një dyshe ‘e paparashikueshme’.

“Dyshe e paparashikueshme dhe të dy nuk kanë pasur marrëdhënie shumë të mira me ndërkombëtarët. Nuk mendoj se kombinimi ndihmon Kosovën”, – tha Znj. Emini.