Balla: “Ajatollahu i fundit në Evropë”, sulmoi vilën e Enver Hoxhës

Kreu i grupit parlamentar të PS-së, Taulant Balla, komentoi nga seanca plenare e të hënës pasdite protestën e opozitës dhe sulmin ndaj ish-vilës së Enver Hoxhës në Tiranë. Balla e përshkroi ish-kryeministrin Sali Berisha si “Ajatollahu i fundit i mbetur në Evropë”, duke bërë paralelizimin mes sulmeve në Lindjen e Mesme dhe protestës së dhunshme të PD-së më 28 shkurt.

Ai tha se ndërkohë që SHBA dhe Izraeli godisnin Iranin, Berisha sulmoi vilën e ish-diktatorit Enver Hoxha, e cila aktualisht funksionon si qendër kulturore, dhe brenda saj ndodheshin artistë.

“Ndërkohë që SHBA dhe Izraeli me forcat e tyre godisnin objektivat e regjimit të Ajatollahëve, Ajatollahu i fundit në Evropë, Sali Berisha, urdhëronte sulmin ndaj godinës. Në ato godinë vetëm Saliu ka qenë brenda, i vetmi që mund të hynte dhe të ngrohej pranë zjarrit të diktatorit. Besoj që sot është dita që në emër të PD dhe në linjë me grupin e partive popullore evropiane, të distancoheni nga dhuna”, tha Balla.

Balla theksoi gjithashtu mbështetjen e qeverisë shqiptare ndaj ndërhyrjeve të SHBA dhe Izraelit në Gjirin Persik dhe solidaritetin e Shqipërisë me vendet aleate, duke bërë të qartë se qëndrimi i vendit për sigurinë dhe mbrojtjen e popullit dhe partnerëve strategjikë është i pandryshuar.