Debati për ish-vilën e Enverit, Bardhi i përgjigjet Ballës: Distancohuni nga korrupsioni

Kreu i Grupit Parlamentar të PD-së, Gazment Bardhi, replikoi në parlament me kreun e grupit socialist, Taulant Balla, pas kërkesës së tij që PD të distancohej nga protestat e dhunshme dhe sulmi ndaj ish-vilës së Enver Hoxhës. Bardhi theksoi se PD distancohet nga dhuna, korrupsioni dhe politikanët e lidhur me krimin e organizuar.

Bardhi theksoi se informacionet mbi pronat publike, si ajo e kaluar për menaxhim te një fondacion francez francez, u bënë të ditura vetëm pas protestës së 28 shkurtit.

“Distancohemi nga dhuna e korrupsionit, nga politikanët e lidhur me krimin e organizuar dhe nga çdo krim. Nuk rrimë në paradhomën e Ramës për të ditur çfarë qokash bën ai me pronat e shqiptarëve. Kur të distancoheni nga krimi i organizuar dhe korrupsioni, atëherë do të plotësohet edhe kërkesa e Komisionerit të Jashtëm Evropian,” tha Bardhi.

Replika e tij erdhi pas kërkesës së Ballës që PD të distancohej nga dhuna në protesta dhe sulmet ndaj ish-vilës së Enver Hoxhës. Bardhi theksoi se distancimi i tyre ka të bëjë me parimet dhe ligjshmërinë, jo me mungesën e informacionit për veprimet e qeverisë.