Balla takim me shqiptarët në Augsburg: Do mbështesim klasat e gjuhës shqipe jashtë

Ministri i Shtetit për Marrëdhëniet me Parlamentin, Taulant Balla, zhvilloi një takim me shqiptarët në Augsburg, të Gjermanisë, ku theksoi rolin kyç të diasporës në ruajtjen e gjuhës dhe kulturës shqiptare. Balla u shpreh se në Landin e Bavarisë janë organizuar mbi 35 klasa për mësimin e gjuhës shqipe, duke vlerësuar angazhimin e qendrave kulturore në promovimin e kulturës dhe gjuhës kombëtare.

Ai vuri theksin te rëndësia e ruajtjes së identitetit shqiptar përmes gjuhës dhe kulturës, duke përmendur se përpjekjet e qeverisë shqiptare do të vazhdojnë për të mbështetur këto qendra kulturore dhe klasat e mësimit të gjuhës shqipe. Gjithashtu, Balla falënderoi Konsullatat e Shqipërisë dhe Kosovës për bashkëpunimin dhe përkujdesjen ndaj diasporës shqiptare në aktivitete të tilla. Sipas tij, bashkimi i shqiptarëve nga Shqipëria, Kosova, Maqedonia e Veriut dhe Lugina e Preshevës tregon dashurinë e përbashkët për flamurin dhe gjuhën shqipe.

“Faleminderit për ftesën në këtë qendër të rëndësishme kulturore, e cila promovon vlerat më të mira të kombit Shqiptar, promovon gjuhën shqipe, promovon letërsinë shqipe dhe pse jo dhe mbështet edhe djemtë dhe vajzat që duan të merren me sport. Unë e them shpesh, jo vetëm në këtë rast, por edhe në raste të tjera për shëmbull që kombëtarja e futbollit e Shqipërisë është shembulli më i bukur, sesi djem nga të gjitha viset Shqiptare bëhen bashkë për të ngritur lart flamurin tonë kombëtar, kështu që më pëlqen shumë që në këtë qendër që jemi sot, tek e cila djemtë dhe vajzat, fëmijët mësojnë gjuhën shqipe të mblidhemi dhe të lexohen poezi në gjuhën shqipe dhe të promovohet gjuha jonë e bukur shqipe. Isha dy ditë më parë në konsullata tona po që janë në një godinë konsullata e përgjithshme Republikës së Shqipërisë dhe konsullata e Përgjithshme Republikës së Kosovës. Dua të falenderojë të dy Konsujt për përkujdesjen që bëjnë për pjesëmarrjen e tyre në sa më shumë aktivitete. Edhe prezenca sot këtu është shumë domethënëse kemi shqiptarë Shqipërisë, Kosovës të Maqedonisë së Veriut dhe nga Presheva dhe kjo është diçka shumë e bukur që ajo që na mbledh është dashuria për kombin, dashuria për flamurin, dashuria për gjuhën shqipe . Unë dua të ju garantoj në emër të Qeverisë Shqiptare që ne do të vazhdojnë të bëjmë gjithçka që duhet për ti mbështetur këto qendra kulturore, për të mbështetur klasat e mësimit të gjuhës shqipe”, tha Balla.