Ballkani bashkohet në Festivalin e Pogradecit, 15 vjet rrugëtim me filmin dhe shijen

Në Pogradec ka nisur edicioni i 15-të i Festivalit Ballkanik të Filmit dhe Kulinarisë, ku do të prezantohen 40 prodhime kinematografike. Organizatorët dhe pjesëmarrësit vlerësojnë festivalin, i cili promovon filmat e rajonit dhe kulinarinë ballkanike.

Festivali që bashkon të gjitha vendet e Ballkanit dhe prodhimet e fundit të kinemasë është bërë pjesë e qytetit liqenor ndërsa drejtoresha e festivalit, Gerta Qurku thotë se ka qenë një sfidë për ta mbajtur gjallë atë.

“Jemi të lumtur që kemi mbërritur në vitin e 15-të. Nuk ka qenë e thjeshtë si rrugë. Të mendosh gjithë njerëzit që na kanë shoqëruar në këtë rrugëtim… Në këtë edicion jemi të pëmalluar për ata që s’janë më. Jemi falënderues qytetit të Pogradecit, sepse ashtu siç u mendua që do i shkonte, e pranoi dhe e mbajti.”

Për të prodhuar një film në Ballkan është gjithmonë e më e vështirë, ndaj kjo e bën festivalin edhe më interesant, thotë regjisori Elis Mataj.

“Kur ka pasion dhe vazhdimësi, gjithmonë ka rezultat. Janë më kërkues, spektatorë arti më të mirë, e gjejnë veten. Mundësitë janë problematike, fondet të pakta, alternativat po ashtu. Por kush ka interes, gjen bashkëpunime. Është një sprovë. Kinematografia shqiptare është në kërkim, por ka evoluim. Studentët e rinj e kanë treguar që janë të aftë për të qenë në nivel me kolegët e tyre.”

Nga ana tjetër, një nga anëtaret e jurisë vlerëson faktin që festivali nuk e humbet promovimin e kulinarisë në thelbin e vet:

“Hera ime e tretë në këtë festival. Dy herë pjesëmarrëse, tani pjesë e jurisë. Është ngjitur me liqenin, lidhet me ushqimin, dhe kjo është e rëndësishme që nuk humbet esencën. Unë drejtoj një festival të ngjashëm në Maqedoni. Jemi të njëjtë në thelb dhe është mirë që kemi ura bashkëpunimi,” – thotë Lidija Mojosovska, anëtare e jurisë.

Festivali Ballkanik i Filmit dhe Kulinarisë do të zgjasë për 5 ditë në qytetin e Pogradecit dhe janë mbi 40 filma pjesëmarrës në këtë edicion të 15-të.

LEXONI GJITHASHTU:

• “Djali me pantallona rozë”, filmi që jep një paralajmërim të fortë për bullizmin
• Arabia Saudite sjell artizanatin dhe kulinarinë në Tiranë, hapet Java Kulturore