Balluku inspekton punimet në aksin Qukës-Qafë Plloçë: Loti 3, përfundon në mars 2025

Ministrja e Infrastrukturës dhe Energjisë, Belinda Balluku, inspektoi këtë të mërkurë punimet në kantierin e segmentit numër 3 të aksit Qukës-Qafë Plloçë.

Gjatë fjalës së saj, Balluku bëri me dije se problemi i financimit për këtë aks është tejkaluar tashmë dhe po puna po ecën ashtu siç duhet në të tre kantieret, pavarësisht vështirësive gjeologjike.

“Ka shumë rëndësi që të tre kantieret po ecin ashtu siç duhet. Fakti që financimi tashmë është zgjidhur, ka kaluar të gjitha etapat edhe aprovimin e parlamentit do të thotë që nuk e kemi pengesën financiare. Sigurisht gjeologjia këtu do të vazhdojë të jetë sfiduese, pasi duket edhe vetë gjatë punës në këtë kantier, por fakti që në dy lotet e tjera ne kemi ecur me hapa të qëndrueshëm, se nuk është rasti për të thënë këtu me hapa të shpejtë, tregon që problematikat arrijnë të mitigohen”, tha Balluku.

Ministrja e Infrastrukturës dhe Energjisë tha se sa kontratat parashikojnë edhe afatin e përfundimit të kësaj vepre, duke theksuar se edhe në këtë projekt, ashtu sikundër në projektet e tjera infrastrukturore, synimi është përfundimi i tyre para afatit.

“Kantieri i segmentit të tretë ka filluar nga puna dhe njëherë dhe tashmë me hapa të shpejtë pasi parashikohet që ky segment të dorëzohet në muajin mars 2025. Ndërkohë që dy segmentet e tjera, segmenti i parë dhe segmenti i dytë që ndodhen në një ecuri mbi 75% parashikohen që të dorëzohen në dhjetor të 2024”, u shpreh Balluku.

LEXONI GJITHASHTU:

• “Nuklat e inovacionit në çdo ministri”, Balluku: Punonjësit do kenë pagat të larta
• Rama të premten në Britaninë e Madhe, në fokus emigrantët