Banka e Shqipërisë blen 800 milionë euro për të mbrojtur lekun

Forcimi i lekut përballë valutave të huaja ka shtyrë Bankën e Shqipërisë të blejë 800 milionë euro këtë vit ndërkohë që rezerva valutore është rritur në 7.2 miliardë euro.

Nga ana tjetër, buxheti për këtë vit humbet rreth 100 milionë euro nga kjo situatë, pasi mblidhen më pak të ardhura nga doganat.

Pjesa dërrmuese e rezervës valutore mbahet në letra me vlerë, prej 5.3 miliardë euro; më pas janë depozita dhe monedha 1.3 miliardë euro, si dhe 317 milionë euro në shufra ari.

Rezerva aktivizohet në kohë të vështira, krizash apo pasigurish dhe përdoret për të shlyer borxhet në valutë, për të garantuar furnizimin nga importi dhe për të siguruar stabilitet në kursin e këmbimit.

Me kaq rezervë valutore, vendi arrin të mbulojë të paktën 7.3 muaj importe.